"Белем җәүһәрләре" бәйгесендә Татарстан мәктәпләре дә үзара көч сынаша!

Быел "Белем җәүһәрләре" дөньякүләм бәйгесендә яңа номинация булдырылды. «Татарстан Республикасы электрон мәгарифе платформасында иң яхшы белем бирү учреждениесе сайты» дип исемләнгән әлеге номинациядә Татарстан Республикасы электрон мәгарифе (Электронное образование Республики Татарстан) (https://edu.tatar.ru) платформасындагы сайтлар белән республиканың белем бирү учреждениеләре катнаша ала. Бәйгедә катнашу өчен гариза учреждение исеменнән аның җитәкчелеге тарафыннан тапшырыла.

Бәйгедә барлыгы 8 номинация:

Бәйге түбәндәге номинацияләр буенча үткәрелә:

1. «Мәгариф, фән һәм милли тәрбия өлкәләрендә иң файдалы һәм популяр шәхси интернет-проект». Әлеге номинациядә мәгариф, фән, милли тәрбия темаларына багышланган шәхси интернет-проектларның авторлары/җитәкчеләре катнаша ала.
2. «Татарстан Республикасы электрон мәгарифе платформасында иң яхшы белем бирү учреждениесе сайты». Әлеге номинациядә Татарстан Республикасы электрон мәгарифе (Электронное образование Республики Татарстан) (https://edu.tatar.ru) платформасында Татарстан Республикасының дәүләт телләрендә тигез дәрәҗәдә файдалы һәм актуаль мәгълүмат урнаштырылып барган сайтлары белән республиканың белем бирү учреждениеләре катнаша ала. Бәйгедә катнашу өчен гариза учреждение исеменнән аның җитәкчелеге тарафыннан тапшырыла.
3. «Мәдәният, туризм, милләт һәм милләтләр дуслыгы өлкәләрендә иң файдалы һәм популяр интернет-проект». Әлеге номинациядә татар мәдәниятенә, туризмга, Татарстан Республикасы табигатенә багышланган, Россия Федерациясенең башка төбәкләрендә һәм чит илләрдә татар телен һәм мәдәниятен саклаучы татар оешмалары/берләшмәләр/шәхесләр булдырган интернет-проектларның авторлары/җитәкчеләре катнаша ала.
4. «Сәясәт, эшмәкәрлек һәм икътисад өлкәләрендә иң файдалы һәм популяр интернет-проект». Әлеге номинациядә сәясәткә, эшмәкәрлеккә, икътисадка багышланган интернет-проектларның авторлары/җитәкчеләре катнаша ала.
5. «ВКонтакте социаль челтәрендә татарча иң файдалы һәм популяр төркем/берләшмә». Әлеге номинациядә ВКонтакте социаль челтәрендә язылучылары саны 1000 кешедән күбрәк булган файдалы һәм популяр татарча төркемнәр/берләшмәләрнең авторлары/җитәкчеләре катнаша ала.
6. «Иң файдалы һәм популяр татарча видеоблог/видеоканал». Әлеге номинациядә Youtube, Rutube, Vimeo һ.б. видеохостингларда татар телендә алып барыла торган видеоблог/видеоканал авторлары/җитәкчеләре катнаша ала.
7. «Иң файдалы һәм популяр татарча мобиль сервис яисә мобиль кушымта». Әлеге номинациядә татар телендә эшләнгән яисә татар теленә өйрәтә торган файдалы һәм популяр мобиль кушымта, мобиль сервис/скрипт яисә чат-ботларның авторлары/җитәкчеләре катнаша ала.
8. «Татарча Википедияне үстерүдә иң зур өлеш керткән википедияче». Әлеге номинациядә Википедиянең татарча бүлеге үсешенә өлеш кертүчеләр катнаша ала.

Бәйгедә катнашу өчен Нигезләмә белән танышыгыз һәм Анкетаны тутырыгыз.