|
|
 Татарстанда быел 20,4 меңнән артык укучы 11нче сыйныфны тәмамлый. 9нчы сыйныфны тәмамлаучылар саны исә 36 меңнән артык. Бүген ТР Министрлар Кабинетында, республикада 2014 елда чыгарылыш сыйныф укучылары өчен Дәүләт йомгаклау аттестацияләре үткәрүгә кагылышлы үзгәрешләр хакында сөйләделәр. Чарада ТР мәгариф һәм фән министры урынбасары, министрлыкның күзәтчелек һәм контроль идарәсе башлыгы Равил Хәмитов катнашты. “БДИ һәм Дәүләт йомгаклау аттестациясендә (ГИА) сизелерлек үзгәреш көтелми. Укучылар үзләре аларны сизмәскә дә мөмкин”, - дип белдерде ул ыгышында. 9нчы сыйныфлар, гадәттәгечә, рус теле һәм математикадан имтиханны мәҗбүри рәвештә тапшыра. Калган 10 предмет (рус әдәбияты, физика, химия, биология, география, тарих, чит телләр, җәмгыять белеме, информатика, татар теле һәм әдәбияты) арасыннан укучы теләгәнен үзе сайлап ала.
Шулай да, төп дәүләт имтиханнарының контроль-хисап материалларына берникадәр үзгәреш кертелгән. Әйтик, биология, физика, география, химия һәм җәмгыять белеме кебек фәннәрнең аерым бер биремнәрен эшләгән өчен балл саны башка еллардагы кебек куелмаска да мөмкин, шулай ук биремнәрнең элеккеге тәртип буенча урнашмавы күзәтелергә мөмкин.
Быел Дәүләт йомгаклау аттестациясен кабат тапшыру мөмкинлеге түбәндәге очракларда биреләчәк: әгәр укучы рус теленнән яки математикадан канәгатьләндерерлек нәтиҗә күрсәтмәсә, җитди сәбәпләр аркасында имтиханга килә алмаса яки, авырып китү сәбәпле, биремнәрен эшләп бетермәсә. Әмма бөтен сәбәпләр дә документ белән расланган булырга тиеш. Нәтиҗәләре белән канәгать булмаганнар апелляциягә бирү хокукына ия.
БДИга килгәндә, барлык фәннәрдән дә минималь баллар саны үзгәрешсез калган. Әйтик, былтыр рус теленнән иң әз балл күрсәткече 36 булса, быел да ул шул ук.
Биремнәрне чишүгә бирелгән вакыт үзгәрмәгән: математика, физика, әдәбият, информатика өчен 3 сәг. 55 минут, рус теле,тарих, җәмгыять белеменә 3 сәг. 30 минут, биология, география, химия, чит телләргә 3әр сәгать вакыт бирелә.
“Физик мөмкинлекләре чикләнгәннәр өчен имтихан тапшыруга бирелгән вакыт күләме 1,5 сәгатькә арта. Әгәр укучы имтиханда 4 сәгатьтән артык утырса, аңа тамак ялгап алу яки сәламәтлеге өчен мөһим медицина процедуралары узу мөмкинлеге тудырылачак”, - диде урынбасар.
Быел имтиханнарны 26 майдан 19 июньгә кадәр уздырачаклар.
Тагын шунысын да искәртеп китү мөһим: армиягә чакырылганнар, укуын дәвам итү өчен чит илгә китүчеләр, медицина күрсәтмәләре буенча дәвалау-профилактика учреждениеләренә барырга тиешлеләр һәм, Россия яки халыкара спорт ярышларына бәйгеләрендә катнашу сәбәпле, билгеләнгән датада имтихан тапшыра алмаучылар имтиханнарын 21 апрельдән 8 майга кадәр тапшырып бетерү мөмкинлегенә ия. Мондый имтиханнар апрельнең 21 нче числосында рус теле, 28 нче числосында математика буенча булачак.
Айгөл Закирова
|
АКТАНЫШ
ЕЛ ВАКЫЙГАСЫ
.
.
.
.
.
.
.
.
.
.
.
.
.
.
.
.
.
.
.
.
.
